Dili, Timor Leste / Timor Post 4 Nov 2009
Relasiona ho Loron Nasional ba Feto Timor Leste sira nian ne’ebe monu iha dia 3 Novembru, deputada iha Parlamentu Nasional fo parabens no husu feto sira iha rai ida ne’e atu hamrik metin no brani hodi fo sira nia kontribuisaun ba dezenvolvimentu nasional.
Sira mos dehan loron nasional ne’e mos sai hanesan loron refleksaun ida ba feto sira hodi hanoin kontribuisaun ne’ebe maka feto sira fo ba rai ida ne’e.
Xefe Bankada Fretelin, Aniceto Guterres hateten loron horisehik hanesan loron espesial ida ba feto TL hodi hanoin fila ba saudoso feto Timor ne’ebe fo kontribuisaun maka’as ba rai ida ne’e.
“Loron 3 Novembru hanesan loron sepesial ida ba inan-feto Timor Leste hodi hanoin fila ba Saudoso Maria Tapo nia mate, ne’ebe fo kontribuisaun maka’as ba luta naruk rai doben ida ne’e,” dehan Aniceto iha uma fukun Parlamentu Nasional.
“Loron espesial atu ita hanoin fila fali kontribuisaun ne’ebe maka feto Timor Leste luta ba rai ida ne’e, ne’ebe hari nanis ona iha 1975 husi Comite Central Fretelin no Organizasaun Popular Mulher de Timor (OPMT),” dehan tan Aniceto.
Tuir nia katak feto hanesan perseiru ba dezenvolvimentu iha direitu hanesan mane hodi fo dedikasaun no kontribuisaun ba dezenvolvimentu rai ida ne’e. Tamba nia hateten feto sira tenki kontinua hamrik metin hodi involve diak liu-tan iha prosesu dezenvolvimentu nasional.
“Komemorasaun ida ne’e hanesan fanu feto Timor atu hamrik metin liu-tan no organiza diak liu-tan hodi fo kontribuisaun ba rai ida ne’e maske feto maluk iha area rurais sei moris iha mukit no kiak nia laran maibe sira (Fretelin) sei hamrik fo aspirasaun liu-husi sira nia bankada iha Parlamentu Nasional, “ dehan nia.
Entertantu Xefe Bankada Kota Dr. Manuel Tilman fo hanoin katak ho loron nasional ba feto Timor Leste, nia parte husu atu la bele lori feto nia naran sai projeitu deit maibe tenki tau mos atensaun ba feto sira iha area rurais.
“Hau hanoin loron ida ne’e loron espesial ba feto Timor Leste maibe ho loron hanesan ne’e tenki hanoin mos feto sira ne’ebe moris iha area rurais ne’ebe la bele hodi foti feto nia naran hodi halo projeitu deit, “ dehan deputadu Manuel Tilman.
Maibe nia mos la haluha ho komemorasaun horisehik ne’e nia fo nia parabens ba feto hotu-hotu iha Timor Leste atu bele iha esperansa nafatin hodi fo kontribuisaun ba rai ida ne’e.
“Ho loron ida ne’e mos hau la haluha fo hau nia parabens ba inan feto sira iha area rurais sira nomos ita Timor oan hotu hodi hanoin fali ita nia saudozo feto sira ne’ebe mate ona i feto sira ne’ebe agora fo nafatin sira nia kontribuisaun ba rai ida ne’e,” dehan nia.(TP 4 Nov 2009/Ono)***
0 comments:
Post a Comment